नवी मुंबई : महानगरपालिका क्षेत्रासाठी पाणी पुरवठा करणाऱ्या मोरबे धरण जलाशयामधील पाणीसाठयात दैनंदिन घट होत आहे. सदर पाणीसाठा अधिकाधिक काळ नागरिकांच्या उपयोगात यावा यादृष्टीने खबरदारीचा उपाय म्हणून आणि भारतीय हवामान खात्याने “एल-निनो” व “आयओडी” बाबत वर्तविलेल्या अंदाजानुसार कमी मान्सूनचे प्रमाण लक्षात घेता व त्याकरिता महाराष्ट्र शासनाच्या प्राप्त निर्देशानुसार, नवी मुंबई महानगरपालिका क्षेत्रात सोमवार, दि. 25 मे 2026 पासून 10 टक्के पाणी कपात लागू करण्याचा निर्णय नवी मुंबई महानगरपालिकेने घेतला आहे.

नवी मुंबई महानगरपालिका क्षेत्रात मोरबे धरणातून व म.औ.वि.महामंडळाच्या बारवी धरणातून दैनंदिन पाणी पुरवठा करण्यात येतो. मोरबे धरणाची एकूण पाणी साठवण क्षमता 190.890 द.ल.घ.मी. इतकी असून, सद्यस्थितीत मोरबे धरणात प्रत्यक्ष 36.470 द.ल.घ.मी. (19.11%) इतका उपयुक्त जलसाठा आज अखेर उपलब्ध आहे.

या जलसाठयावर महानगरपालिकेचे अत्यंत बारकाईने लक्ष असून, दैनंदिनरित्या नियमितपणे व नियोजनपूर्वक महानगरपालिकेमार्फत पाणी पुरवठा केला जात आहे. नवी मुंबई महानगरपालिका क्षेत्रासाठी सद्यस्थितीत पुरेसा जलसाठा उपलब्ध असून, नवी मुंबईकरांनी घाबरुन जाण्याची आवश्यकता नाही. तथापि, वरील संभाव्य कारणे लक्षात घेता यावर्षीसाठीची व पुढील वर्षासाठीची उपाययोजना म्हणून नवी मुंबई महानगरपालिकेमार्फत पाण्याचे अचूक नियोजन करणे आवश्यक आहे.

नवी मुंबई क्षेत्रात व मोरबे धरण क्षेत्रात नियमित होत असलेली कमाल तापमान वाढ आणि त्या अनुषंगाने धरणाच्या पाण्याचे होणारे कमाल बाष्पीभवन यामुळे 10 टक्केपेक्षा कमी जलसाठा झालेनंतरही पाणीपुरवठा सुरळीत व नियोजनपूर्वक करणे, या सर्व बाबींचा साकल्याने विचार करता, खबरदारीचा उपाय म्हणून नवी मुंबई महानगरपालिकेने 10 टक्के पाणी कपात लागू करण्याचा निर्णय घेतलेला आहे. तसेच मोरबे धरणातून सिडको नोड मधील खारघर व कामोठे या सिडको क्षेत्राला सुध्दा 10 टक्के पाणीकपात लागू राहणार आहे.

वरील पाणी कपात ही मोरबे धरण क्षेत्रात समाधानकारक पर्जन्यमान होऊन जलाशयामधील उपयुक्त जलसाठ्यामध्ये सुधारणा होईपर्यंत लागू राहणार आहे.

नवी मुंबई महानगरपालिका क्षेत्राची यावर्षीची व पुढील वर्षाची पाणी पुरवठयाची गरज लक्षात घेता, नवी मुंबई महानगरपालिका क्षेत्रामध्ये आठवडयातून दोन दिवस संध्याकाळचा पाणीपुरवठा बंद ठेवून पाणी बचत करण्याचे महानगरपालिकेमार्फत नियोजित आहे.

खालील नमूद विभागात आठवडयातून दोन दिवस संध्याकाळचा पाणी पुरवठा बंद ठेवण्यात येणार आहे. सदरची 10 टक्के पाणी कपात सोमवार, दि. 25 मे 2026 पासून अंमलात येईल.